Humor Manado: Kuliah di Jakarta

Utu dari Tonsea dapa terima kuliah di UI, Universitas Indonesia di Jakarta. Merantau no dia pigi di Jakarta menuntut ilmu.

Tiap hari dia lia depe tamang-tamang pigi kuliah nae oto sandiri. Utu kasiang cumang nae metromini deng tuh angkutan kota laeng dang.

Bagaimana mo cari cewe bakulawang deng depe tamang2 yang punya oto sandiri.

Satu hari Utu so nda tahang, dia ba telepon deng depe papa di kampung.

Utu: Pa, nda mo baklak, maar napa lia kwa kita pe tamang-tamang disini, dikampus ada bawa Kuda, Panther, Kijang, no kita dang?

Papa: Ooo kasiang sekali ngana Utu, jang tako, Papa disini banya sekali Babi, nanti Papa kirim akang satu Babi pa ngana…

LAGU: So Nyanda Guna

Salah satu lagu yang paling populer dikalangan orang Manado.

Video Klip dibawah ini diambil dari Youtube, account name: baguiousa

Dari dulu so dari dulu kita so bilang
Cuma ngana yang kita sayang

Manyasal skali manyasal skali ngana putar bale
Ngana sayang pa orang laeng

So nyanda guna, so nyanda guna, ngana mo manyasal, sayang
Ngana pe beking beking pakita pakita so talanggar skali

So nyanda guna so nyanda guna ngana mo manyasal sayang
Kita pe hati so saki so saki so saki skali

Manyasal skali, manyasal skali, ngana putar bale

Ngana sayang pa orang laen

So nyanda guna so nyanda guna ngana mo manyasal sayang
Kita pe hati so saki so saki so saki skali

Humor Manado: Adam dan Hawa

Utu deng Alo da dudu di kobong, istirahat dari bakerja, so lapar. Dorang se-abis waktu deng bacirita.

Utu: Alo, ngana tau kalo Adam deng Hawa itu orang manado, torang manusia ini nda mo taiko jatung dalam dosa…

Alo: Kiapa bole bagitu?

Utu: Iyo, dorang nda mo tertarik mo makang tu Apel, dorang lebe suka pa tu Ular, tangka bakar kong taru rica…

Humor Manado: Saudara Saudari

Ini acara ulang taun desa. Semua undangan dari Camat sampe Kapolda so datang lengkap dengan pasangan masing-masing.

Pe lia tu tamu-tamu yang datang orang-orang top, Kuntua yang memang baru dilantik nda mau jao-jao kong dia mau dia le disebut kalau ada sambutan. Jadi dia mo suru jo pa Pala for kase kata sambutan. Kong kuntua pangge pa Utu, depe Pala.

Kuntua: Utu, kita kase kesempatan pa ngana tampil, ngana jo tu kase kata sambutan selamat datang.

Pala: Ala kuntua, kita nintau le mo bicara apa…

Kuntua: Bagini jo, ngana sapa samua tu tamu tamu undangan, kong ngana maso no di sambutan…maar jang lupa ngana bilang le kita, ngana pe Kuntua yang terhormat deng ibu nee, jang cuman pa Kapolda deng Camat tu terhormat.

Pala: Maar bagaimana dang mo mulai?

Kuntua: Mulai jo deng Saudara dan Saudari…

Kong Pala mulai…

Saudara Saudari yang saya kasihi,

yang terhormat Pak Kapolda dan ibu Kapoldi,

yang terhormat Pak Camat dan ibu Camit,

dan yang terhormat Pak Kuntua dan ibu Kunt …

Humor Manado: Gubernur deng Tukang Bensin

Gubernur deng ibu da dalam perjalanan santai nae oto mo makang di Tinoor. Kali ini pak Gub cumang berdua deng ibu, nda ada vooreijder dan ajudan. Mo nostalgia jaman pacaran dulu.

Ditengah perjalanan pak Gub lia tu bensin so mo abis kote, daripada ta berenti di jalang, pak Gub singga isi bensin. Sampe di pom bensin, Ibu Gub kaluar kong bacirita deng tukang isi bensin, rupa akrab dang dorang.

Abis isi, Ibu bale di oto, Pak Gub so nda tahan mo batanya.

Pak Gub: Ma, siapa tu tadi, rupa akrab sekali…

Ibu Gub: Oo itu kita pe Mantan dulu sebelum deng ngana, lama torang batona dulu.

Pak Gub (stel sombong): Ngana musti bersyukur Ma dulu putus kong baku dapa deng Papa, kalo nda, jadi istri tukang isi bensin ngana, bukang istri Gubernur…

Ibu Gub: Ado kasiang Papa, ngana tu musti bersyukur, kalo kita da ta trus deng dia, so jadi Gubernur dia, ngana tu disana ba isi bensin.

Humor Manado: Bajalang pake mata

Oom Ance baru pulang dari kantor, hari ini nda bagus for dia, baru dapa masalah basar di kantor. De pe muka so tre skali, sontong sadiki makang orang stow dia.

Bajalang pulang baku tabrak dia deng Utu, riki ciri depe tas.

Oom Ance (batoreba): KudaC**i ngana, pake ngana pe mata kalo bajalang

Utu (deng depe muka innocent) : Oom Ance, so itu dia Oom pe salah, mata itu for balia, kalau bajalang pake kaki…

Humor Manado: Surat Sakit

Utu kalamaring nda maso sekolah lantaran dia da dapa saki. Sampe disekolah, depe enci tanya pa Utu…

Enci: Utu, kiapa ngana nyanda maso sekolah kalamaring?

Utu: Dapa saki kita Enci…

Enci: Saki apa ngana Utu?

Utu: Flu Babi, da ta jangke pa papa pe tamang baru pulang dari holland…

Enci: Kong kiapa ngana nda kirim surat dang?

Utu: Parcuma mo kirim, hele tape surat waktu da saki tu lalu enci belum balas…

Humor Manado: Matahari atau Bintang…?

Malam sekali, so amper jam 2, bulan da bersinar terang sekali. Ance deng Utu baru dari pesta, minum-minum, so mabo brat dorang.

Ance: Utu, co ngana liat tu diatas itu, ngana tau apa itu?

Utu: Matahari itu Ance..

Ance: Ah bodok ngana, tenga malam bagini mo ada matahari dari mana, bintang itu…

Utu: Eh Ance, ngana tu bodok, mana lei ada bintang pe trang bagitu…(kong ada orang lewat)…Nee ada orang lewat, coba ngana tanya pa dia…

Ance: Eh kawan, ngana lia tu diatas itu, apa itu?

Orang Lewat: Odo mana kita mo pitau lei itu, kita kwa orang baru disini…

Humor Manado: Opa, Ance dan Katapel

Sore-sore dikintal muka, Opa da dudu dibawah pohon sambil lia-lia Ance depe cucu da bermaeng. Ance da bermaeng katapel. Dia pake tu katapel for ba tembak blek-blek yang dia so susun.

Opa: Ance, bae-bae ne jang sampe kana pa Opa tu batu.

Ance: Iyo Opa, nda kwa mo kena pa Opa ini…

Kong beberapa menit kemudian…

Opa: Ance…

Ance: Kiapa Opa?

Opa: Bae-bae ne ngana bermaeng itu…jang sampe kana pa Opa tu batu ne…

Ance: Iyo Opa, so bilang tadi dang…kita kwa da keker butul tu blek-blek itu…

Opa: Iyo, maar kalu ngana tembak tu blek kong kana, itu batu bole mo ta pantul pa Opa pe kapala disini…

Ance so grel lei daritadi ba keker tu blek nda ja kana…

Ance: Opa, bagini jo dong, kita tembak jo pa Opa pe kapala, biar depe batu ta pantul kong kana di blek-blek…

Humor Manado: Telinga Merah dan Telepon

Utu pigi di dokter mo batanya soalnya dia pe dua talinga so merah malopo.

Dokter: Utu, kiapa ngana pe talinga?

Utu: Bagini pak Dokter, kita kwa da ba strika baju, kong tu telepon ba bunyi. Kong kita iko angka, maar bukang angka tu telepon, tu strika kasiang tu ta da angka kong taru pa tape talinga…bagitu pak Dokter depe cerita.

Dokter: Ooo dapa sayang skali do ngana, maar kiapa dang tu talinga satu lei?

Utu: Oo tuh biongo itu kwa batelepon ulang…

Humor Manado: Percakapan dalam Bar di Los Angeles

Ini joke lama, so banya beredar dengan berbagai macam bahasa. Ceritanya begini…

Utu da pasiar di Amerika, baru sampe di Los Angeles dia iko pigi di bar.

Ini Oom disebelah pa Utu bilang pa bartender, “JOHNNIE WALKER, SINGLE”, terus dia pe tamang lei, “JACK DANIELS, SINGLE”. Kong ni Bartender kase no dorang pe minuman. Utu cumang da lia-lia, ba belajar kwa dia.

Kong tu Bartender badekat pa Utu kong batanya, “AND YOU, SIR?”

Kong Utu bage, “UTU KAMBEY, MARRIED”.

PS: Sorry sorry kalo ada yang nama sama diatas, cuma for grap-grap, nda bermaksud apa-apa.

Humor Manado: Basopir pertama kali

Ferrel baru dapa dia pe SIM, Surat Ijin Mengemudi. Dapa SIM A dia, jadi so bole babawa oto. Jadi tu satu keluarga itu, Ferrel pe Papa Mama deng depe ade-ade lei mo bajalang, bermaeng pi di Tomohon. Ferrel mo basopir untuk pertama kali.

Utu, dia pe papa iko nae kong dudu dibelakang, pas dibelakang pa Ferrel.

Ferrel: Ooo Papa pasti dudu dibelakang mo ganti pemandangan dulu, so lama dudu trus dimuka, bastir kong berapa minggu ini lei dudu dimuka ajar-ajar pa kita cara bawa oto…

Utu: Ooo bukang itu, Papa dudu dibelakang supaya bole skop skop pa ngana pe kursi, biar ngana tau depe rasa dapa skop dibelakang pas babawa oto, sama no deng apa ngana da beking bertahun-tahun ini.

Humor Manado: Pengadilan

Pengadilan sedang menggelar sidang kasus pembunuhan, Oom Ungke menjadi terdakwa.

Hakim: Saudara didakwa membunuh tukang kredit dengan menggunakan gergaji.

Pe dengar itu, Utu iko badiri kong bataria, “KUDA C**I”…

Hakim langsung memperingatkan, “Pengunjung harap tenang”. Sidang dilanjutkan.

Hakim: Saudara juga didakwa membunuh petugas penagih pajak dengan menggunakan Palu.

Pe dengar itu, Utu iko badiri ulang kong bataria momake ulang, “PEM*I”.

Kali ini Hakim iko balia pa Utu, so mulai grel dia. Utu iko dudu kong badiam. Sidang dilanjutkan.

Hakim: Saudara juga didakwa membunuh Kuntua dengan menggunakan Kunci Inggris.

Pe dengar itu lei, Utu momake ulang, “PEND*K”

Hakim yang mulai ilang sabar batanya pa Utu.

Hakim: Kenapa saudara membuat keributan disini? Saudara bisa dihukum karena menghina pengadilan.

Utu: Maaf pak Hakim, bagaimana kita nda mo grel pa Hakim. Kita ini terdakwa pe birman, tetangga pak Hakim. Selama ini tiap kita mo pinjam Gergaji, Martelu atau Kunci Inggris, ni Ungke ini selalu bilang nda ada.

Humor Manado: Hati-hati menyebrang jalan

Sekolah da libur panjang, pagi-pagi abis smokol Ance minta ijin pa depe Mama mo bermaen pa Utu, dia pe tamang sekolah pe rumah.

Ance: Mama, kita mo pigi bermaen dule ne pa Utu pe rumah

Mama: Oo bole, pigi jo ngana, maar hati-hati ne, kalo mo ba potong jalang tunggu oto lewat dulu baru ngana ba potong ne…

Ance: Iyo Ma..

Setenga jam kemudian, Ance so bale, manangis le dia pa karas…

Mama: Adoo, kiapa ngana manangis Ance, orang da tumbu ato apa pa ngana? (Mama so ba grel sadiki, so nae tu darah)…

Ance: Bukang Mama…

Mama: Bakalae ngana deng Utu?

Ance: Bukang Mama..belum sampe tre kita pa Utu pe tampa…

Mama: Kong kiapa dang ngana ma nangis Ance?

Ance: Mama kwa tadi da bilang tunggu Oto lewat dulu baru ba potong…Ance so tunggu-tunggu, nda ada Oto lewat…