Humor Manado: So perna nae Harley ngana?

Oom Ance baru bli Harley Davidson, motor besar yang mahal sekali depe harga.

Hari ini baru ambe tu motor kong mo langsung reyen. Di jalan baku dapa deng Utu da nae Oto, Oom Ance batanya pa Utu…

Oom Ance: Nyong, so perna nae Harley ngana?

Utu nda bajawab, tekeng setau, dia pikir, pe somse le ni Oom satu, ba pamer nae Harley, rupa kita nda mampu jo, maar memang nda mampu katu kita.

Kong Utu tancap gas mo setinggal jo ni Oom Ance. Maar Oom Ance tetap badusu, kong batanya ulang…

Oom Ance: Nyong, so perna nae Harley ngana?

Utu masi tekeng setau, maar so mulai fugado, dia tancap gas ulang mo setinggal ni Oom Ance, maar Oom Ance tetap badusu, kong batanya ulang…

Oom Ance: Nyong, so perna nae Harley ngana?

Utu: Do do e Oom pe sombong sekali do…ba jao jo Oom…

Kong, nda sangka-sangka abis Utu suru ba jao, Oom Ance kecelakaan kasiang. Merasa bersalah Utu seberenti depe oto kong turun babantu pa Oom Ance yang setenga flao.

Begitu sadar, Oom Ance iko batanya…

Oom Ance: Nyong, so perna nae Harley ngana?

Utu: Ado Oom, stop jo deng tu pertanyaan, so jatung le mo ba sombong.

Oom Ance: Oo bukang itu kasiang, kita cuma mo batanya dimana kang ni Harley pe rem?